Historia & purtaders

L’historia dalla Casa s. Martin va lunsch anavos. Gia igl onn 1889 ha la vischnaunca da Trun surpriu l’incumbensa dil cantun Grischun dalla "Casa Baviera" e mess a disposiziun quella sco "Casa pauperila" che vegneva era numnada "ospital". In pass impurtont ei succedius igl onn 1960 culla fundaziun "Asil s. Martin". Mo paucs onns pli tard, ils onns 1964 entochen 1966, ei resultau in edifeci niev a Dulezi ch’ei staus la basa per la Casa s. Martin actuala.

Ils onns 1996 entochen 1998 han ils dus purtaders – la fundaziun Casa s. Martin e la corporaziun Casa da tgira Sutsassiala – renovau ed engrondiu il baghetg existent. Ils onns 2010 entochen 2011 suonda in ulteriur impurtont tierm culla construcziun d'in niev edifeci sper il baghetg principal. Gia il schaner 2012 han ins saviu retrer las novas combras ed habitaziuns: enstagl da mo 7 combras singulas e 33 combras dublas, stattan dapi lu 48 combras singulas e 6 combras dublas a disposiziun.

Era ils suandonts onns ei la Casa s. Martin sesvilupada cuntinuadamein. Ensemen culla vischnaunca da Trun han ins procurau igl onn 2014 per in niev parcadi sur la casa da scola. Igl onn 2015 ei il plaz el sid dalla casa vegnius concepius da niev, la sala da spisa ei vegnida cumpletada cun in curtin d'unviern ed igl entir scaldament d'ieli ei vegnius remplazzaus tras in scaldament geotermic.

Aschia muossa la historia dalla Casa s. Martin a moda impressiunonta co la tradiziun ed il progress sespleighan dapi varga 130 onns da maun en maun – adina en survetsch dallas persunas attempadas che vivan cheu.

Ella Casa s. Martin setenin nus vid in in management sistematic da qualitad tenor la metoda F.E.E® ed il certificat ISO 9001:2015. Aschia garantin nus che nossas prestaziuns seigien transparentas, conformas al basegns e cun cumpetenza – adina adattadas allas resursas individualas da nossas cussadentas e da nos cussadents. Nies sistem da management vegn examinaus e sviluppaus cuntinuadamein per saver garantir ils pli aults standards a moda persistenta.